أنس الحمود

 ———–

نزلم من القطار وعصمان شايل الجناطي..

عصمان: يا الله يوم وصلنا وصلنا هذاك البيت..

أم عصمان: أشوف عندك جيران عرب عصماني؟؟!!

عصمان: شلون عرفتي يما؟

أم عصمان: مبين من البرادي؟

عصمان: أي يما جيراني حلبية، خوش جماعة بس مساكين كل نهار متكاونين..

أم عصمان: باطل باطل عليش يتكاونون؟

عصمان: لأنو المراة هين لقت كل حقوقها وقامت تتطنفر عالزلمة على أدنى سبب..

وصلت أم عصمان مدينة عصمان وريحت يومين بالبيت وسوت مسح سياسي عالحارة كلها، وجم الجيران وسلمم على أم عصمان..

أم عصمان: عصمان خذني على جيرانك الحلبية أريد أشوف شنو قصتهم!!

عصمان: ياأمي بلالچ هالروحة يقولون المرة حيل قوية..

أم عصمان: أبوووووه أبوووه جن هينا وقامن يتملعنن وقامن يتشرطن على رجالهن ، أنت بس خذني عليهم ويصير خير..

الساعة ٥ العصر راحم عصمان وأم عصمان زيارة على جيرانهم الحلبية..

أبو عبدو فتح الباب: تفضلو تفضلو..

شوي أنوب جت أم عبدو: مية السلامة مية السلامة..

أم عصمان: أشوف بيتج حايث (مو مرتب)

عصمان يدق أمو ويشاورها: يوم شكارك ببيت الجماعة عجل أنت لجنة من البلدية؟؟!!

أم عصمان: فوق مهي جايفة زاد تتعنفص على هالزلمة المسكين..

عصمان: يا أمي أنت جاية تهدين النفوس إلا تولعينها بينهم؟؟!!

أم عصمان: أنت بس طول بالك علي ويصير خير..

أبو عبدو يحاچي عصمان: إش تشربو خاي؟

عصمان: چاي چاي اخوي أبو عبدو

قام أبو عبدو تايسوي چاي وچان تقلو أم عصمان: وين رايح خاف إنت تريد تسوي الچاي!!؟؟ باطل باطل،

تدحك على أم عبدو وتقلها: أنتي يومنج مصمودة وزلمتج قام يسوي چاي ماتقوليلي عليش؟

أم عبدو: حجة الله يرضى عليكي خليكي فحالك اللي فينا مكفينا ومن غير شي واصلة بيني وبينو للشيطان الرجيم..

أم عصمان: عليش عاد واصلة للشيطان الرجيم، إش ناقصك؟؟ كاعدة بأوربا وكاعدة ببيت ولا حواليج لا طيارة تقصف ولا دبابة تضرب وإنتي وويلادج بالمدارس وماچلين شاربين نايمين من أحلى مايكون وعين الله عليكم، ماتقوليلي عليش تتطنفرين عالزلمة؟

أبو عبدو: إي إي خالتي فهميها كرامة للنبي لأنو أنا طلع علساني شعر وأنا بحكي معها هالحكي!

أم عبدو: لك محيو أشو طلع صوتك!!

أم عصمان: دحكم يولم تقول لزلمتها لك محيو يول والله عندنا المراة لونها تقول هيج لزلمتها إلا يكط …….. وتأشر بأصبع يدها الاوسط (أبوووووووه ابووووه (

وتكمل أم عصمان: وإنت ياسعدي يومنك مرنخ ومعطيها على كيفها عليش حلات المراة ترجف رجف من خيال جانيها (زوجها).

أم عبدو تدحك على عصمان: حسبنا الله ونعم الوكيل على هالنهار أخوي إنتو جايين زيارة ولا جايين تخربو بيتنا؟!!

أم عصمان: إييييييه زعم إنتي محافظة عليه بالحيل، كاسة جاي ماقمتي تسوين وخليتي الزلمة يقوم يسويها.

أم عبدو: أنا معودتو هيك ورجاء لحدا يتدخل بحياتنا؟

أم عصمان تدحك على أبو عبدو: صحيح يوال هي معودتك هيجذ؟ باطل باطل الله ياخذ الزلمة العفن، دحك يول شطولك اليشوفك يدخل وراك، تخلي مرتك تحجي هيجذ معاك؟

يفور دم أبو عبدو ويتناوش مزهرية عالطاولة ويصلخ بيها أم عبدو على راسها وانو فادع راسها ودمها يشخل، هين أبو عبدو انهزم، وجابم نص كيلو قهوة حطوها على راس أم عبدو أم عصمان تقلها : شوفي النذل شوفي تون قوي عصو وقام يضرب ويتهدد، ماعليش أبوي طولي بالج وبهالبلد مايضيع حق أبدًا..

أم عصمان تحاجي عصمان: قوم قوم أبوي هذول أهل بيت واحد ويحلون مشاكلهم بين بعضهم إحنا مالنا علاقة..

طلعم من عند الجماعة وهما عالطريق أم عصمان تقول لعصمان: خلو بيها ماقصر والله إنو برد قلبي حلاة المراة دوم مكسور راسها ومايطلع حسها..

النهار البعدو جت الشرطة خذت أبو عبدو من  البيت، أم عصمان وعصمان واقفين عالباب، أم عصمان تحاچي أبو عبدو من بعيد: زاد إنت الله يصلحك حدا يضرب هالمراة العاقلة المسكينة بالمزهرية ويفدع راسها، يا الله شكد الناس نفوسها تغيرت بالغربة …

لقراءة الجزء الأول من قصة ترجمان أم عصمان، اضغط هنا